今季表现勇猛嘅阿仙奴,周五(14日)凌晨喺欧霸盃A组幸运赢波,作客1比0击败挪超劲旅波杜基林特,布卡约沙卡一次时来运到嘅「嘴唇入波」成为全场唯一入球。「兵工厂」赢波後3战全胜排榜首,出线形势大好。
面对喺欧洲赛主场14连胜嘅波杜基林特,半力出击嘅阿仙奴,明显未适应用仿真草嘅主场,虽然控球较多但甚少有威胁埋门,唯一入球出现喺24分钟,布卡约沙卡接应森比卢干加直线,快速入楔禁区射门,对方守将虽然瞓身闩到,但个波竟然撞落布卡约沙卡块面反弹入网。
布卡约沙卡赛後表示:「今场好难踢,波杜基林特喺欧洲赛主场连赢14场,冇可能预期会系容易嘅赛事,个入波系撞到我个嘴唇入网,都系一个好好嘅入球!正如我所讲,波杜基林特主场唔易应付,所以呢3分特别重要。」