车路士喺周六(8日)晚英超主场以3比0大胜狼队，今季回巢嘅嘅前锋布查终於开斋，呢位21岁新星早前获车仔开出长约绑实，双方续约至2028年，可见会方视佢为球队未来发展骨干人物，难怪被球迷封为「白魔兽」。
车路士今仗占尽上风，美臣蒙特贡献2次助攻，造就夏维斯、基斯甸普列锡各入1球，布查72分钟後备上阵，并喺临完场前推过对手，射入靓波，亦系呢位新星首次为车路士一队入波。
虽然布查系阿尔巴尼亚国脚，但其实佢喺英国出世，2009年加入车仔青年军，车路士青训系统非常出色，近年不断将一批又一批嘅小将外借出去其他球会，吸收比赛经验，保查亦系其中之一。
佢曾於2020/21年球季被外借去荷甲球队维迪斯，上阵34场入11球及3次助攻。上季重返英超，以借用身份为修咸顿效力，上阵38场入9球及1次助攻，表现令人惊喜，所以车仔会方宁愿放走2位星级射手卢卡古、迪姆华拿，都要同布查续长约。
身高1米91嘅保查唔止高大，而且速度快，并拥有不俗脚法，可以个人盘球突破，技术非常全面，今仗入波正系集力量同技术於一身，甚有车仔传奇射手杜奥巴影子，「白魔兽」之名当中无愧。
由於奥巴美扬已经33岁，只系过度性人物，相信车仔未来锋线系属於布查。
