阿士东维拉开季成绩令人失望，巴西中场菲腊比古天奴成为众矢之的，呢位前利物浦球星今年1月外借加盟後光芒四射，点知维拉用1,700万镑将佢买断後，菲腊比古天奴即刻「隐形」，今季仍未有任何入波或助攻，获评为英超今季最差收购都系实至名归。
已经30岁嘅菲腊比古天奴今季状态低沉，虽然领队谢拉特一直对佢委以重任，但佢8场联赛都冇入波或助攻，连埋上季尾在内，最近20场比赛只有1入波0助攻，谢拉特日前亦暗示阿根廷攻击中场贝安迪亚有机会抢走正选：「古天奴表现已经好转，但佢需要入波或助攻嚟提升信心......贝安迪亚已经准备好正选上阵。」
菲腊比古天奴除花咗维拉1,700万镑之外，佢张合约亦去到2026年，周薪高达12.5万镑，如果佢踢唔番本来水准被贬，意味维拉未来4年都要养住呢位高薪後备，将会成为一大财政负担。
