前西班牙及皇马门将卡斯拿斯，周日（9日）喺Twitter公开宣布出柜，呢位已退役嘅名宿表示：「我希望大家会尊重我，我系一名同性恋者。」更令人惊讶嘅，系佢嘅前西班牙队友、巴塞名宿佩奥尔喺佢帖文下留言：「系时候讲出我哋嘅故事喇。」
41岁嘅卡斯拿斯曾同着名记者莎拉结婚，2010年世盃夺冠时两人相拥一吻，成为一时佳话，佢哋育有两名儿子，不过两人喺上年离婚。卡斯拿斯与佩奥尔，虽然球员时代各自效力死敌皇马及巴塞，但佢哋系西班牙国家队好队友，两人系「狂牛兵团」勇夺2008年欧国盃及2010年世盃功臣。
相关讯息亦喺大批传媒报道後，突然消失，有报道指出，卡斯拿斯系不满近日传媒散播佢嘅绯闻，所以佢用出柜嚟讽刺西班牙传媒。「圣卡斯」其後更新消息，称自己户口被黑客入侵，对所有Fans致歉，同时亦对性小众（LGBT）族群致歉。
