盛传曼联球星C朗打算明年1月转会市场重开後离队，转投有份参加今届欧联嘅球队，令自己可以继续出战呢项大赛。
不过，根据《ESPN》报道，曼联内部人士认为呢位37岁葡萄牙国脚冬季都系走唔到，因为会方并未收到任何欧联球队有兴趣签佢。
虽然今夏曾传出C朗可能加盟车路士、拿玻里、拜仁慕尼黑嘅消息，但原来呢3支欧联球队，从未向红魔鬼提出报价，加上以C朗近期嘅低迷状态，相信更加难有劲旅愿意签入佢。
此外，由於曼联管理层已经决定冬季唔会再花钱收购球员，所以领队坦哈格倾向留住C朗，问题系呢位射手愈来愈不满缺乏上阵时间，将帅之间出现矛盾，至於应该点样化解矛盾，就真考起坦哈格。
