周五(7日)凌晨欧霸盃E组赛事，曼联作客摩尔多瓦球队奥摩尼亚，本来打算可以大胜一场振奋士气，点知踢落竟然陷於苦战。担正嘅C朗拿度今季噩梦延续，全场8次埋门只有1次中龙，包括一次门前6码面对空门射中柱，最讽刺系2位後备前锋拉舒福特同安东尼马迪尔入替後即包办3球，协助曼联险胜3比2。
上场曼市打吡坐足90分钟嘅C朗，喺欧霸盃担正入球意欲极高，队友亦频频为佢制造机会，但系佢嘅射门绝大部份都唔中目标，34分钟更被奥摩尼亚快速反击得手，半场落後0比1。曼联半场将表现极差嘅杜维尔马拉西亚同查顿辛祖收起，改派劳基梳尔同拉舒福特落场，效果立竿见影。
曼联53分钟由拉舒福特追平，另一後备前锋安东尼马迪尔61分钟入场，只系2分钟就射入反超前。78分钟C朗有黄金机会，佢接应达洛治回传，6码点面对大大个龙门竟然射中近柱弹出，注定佢继续食白果；84分钟C朗被力逼下射门冇力，但拉舒福特及时赶到门前补中，即使1分钟後奥摩尼亚再入1球，曼联仍然赢3比2。
曼联领队坦哈格赛後表示：「面对一支咁坚决防守嘅球队，要制造机会唔容易，而我哋今场制造咗好多机会，而且球员喺打击之中好快恢复，交出胜利需要嘅表现。」统计显示C朗今季各项赛事，33次攻门只系入过1球12码，喺曼联前锋位置竞争中，已输畀拉舒福特、安东尼马迪尔沦为「3号前锋」。
