欧联H组赛事竞争激烈，头2轮输晒嘅祖云达斯周四(6日)凌晨终於赢波，主场3比1击败海法马卡比，同巴黎圣日耳门、宾菲加(同得7分)嘅距离拉近至4分，出线仲有一丝希望。
祖云达斯今场靠迪马利亚发动，佢35分钟交出直线畀拉比奥特抽入，50分钟又交出穿透性直线畀杜辛华荷域单刀建功，客队75分钟追番1粒，但迪马利亚83分钟开出角球畀拉比奥特顶入，祖记就凭迪马利亚嘅「助攻帽子戏法」赢3比1。
过去4年欧联只出现过3次「助攻帽子戏法」，而迪马利亚就包办2次，佢喺2019年为巴黎圣日耳门对布鲁日亦有「助攻帽」，另一个系2021年嘅祖奥简斯路(曼城)。迪马利亚嘅精彩助攻，连杜辛华荷域都帮佢「擦鞋」庆祝！
