周三(5日)凌晨欧联死亡C组大战，巴塞隆拿作客控制战局下，以0比1不敌国际米兰，欧联连续3场作客输波兼食白果，系球会史上最差纪录。巴塞输波後3战只得3分排第3位，畀国际米兰(6分)同拜仁慕尼黑(9分)抛开，面临连续第2季欧联分组赛出局嘅厄运。
巴塞今场反客为主，控球率高达68%，不过佢哋面对国米嘅坚固防守就冇乜计，独沽一味「狂斩」博大雾，全场50次传中系沙维上任後最高纪录，当中奥士文尼迪比利一个人就有24次(只有5次成功)，结果入唔到波之余，仲喺上半场补时阶段被查汉奴古禁区外重炮攻陷。
下半场巴塞围攻国米，但罗拔利云度夫斯基被盯死下冇晒板斧，尾段国米後衞杜费斯禁区内疑似手球，但球证睇VAR後认为唔需要罚12码，最终国米赢1比0完场。巴塞教练沙维赛後对VAR判决极度不满：「我好愤怒，球证需要出嚟解释佢嘅判决，我哋今场制造好多机会，但国米只系1次禁区外射波就赢咗，我哋最後3场分组赛要当决赛咁踢。」
连埋上届赛事，巴塞喺欧联作客3连败兼冇波入，系球会欧联史上最差走势，佢哋下场分组赛会返主场再斗国米，将会系出线嘅关键之战。同组拜仁慕尼黑周三主场5比0大炒柏辛域陀尼亚，3战全胜排榜首，晋级机会高唱入云。
