周日（2日）晚英超上演曼市打吡，之前联赛4连胜嘅曼联，作客同市死敌曼城立即崩溃，半场已经落後4粒，「蓝月亮」凭艾宁夏兰特同菲尔科顿齐齐连中三元，夏兰特更成为英超史上首位球员於连续3个主场上演帽子戏法嘅球员，最终以6:3大胜曼联，劲到冇朋友。
曼联赛前有主帅坦哈格及前锋拉舒福特，获选上月英超最佳领队及球员，不过造访有神锋艾宁夏兰特助阵嘅曼城难免受压，一开波夏兰特即施展头槌被闩不远，奇云迪布尼补射畀迪基亚扑出，贝拿度施华再执鸡又被挡。
但过到初一过唔到十五，8分钟贝拿度施华左路横传，菲尔科顿妙射得手，极速打开纪录。「蓝月亮」得势不饶人，34分钟夏兰特接应迪布尼顶入，3分钟後又系佢哋合作，迪布尼於右路妙传畀夏兰特整多粒，完半场前夏兰特助攻科顿近门射成4:0，半场已见唔少「红魔」粉丝冇瘾提早离场。
下半场曼联略有起色，安东尼马菲奥斯施冷箭弯入靓波，追成1:4。可惜佢哋都挡唔到夏兰特，64分钟佢接应沙治奥高美斯横传撞射破网，连续3仗主场联赛连中三元，非常恐怖，72分钟佢再靓交畀科顿完成帽子戏法。虽然曼联靠後备上阵嘅安东尼马迪尔梅开二度，但曼城最终仍然大炒6:3，实在超屈机。
