挪威前锋艾宁夏兰特今季加盟曼城後，短时间内即交出「怪物级」嘅数据，「曼市打吡」轰入曼联3球後，佢登陆英超只系第8场，已经3次连中三元，同踢紧第8季嘅C朗拿度喺英超「戴帽」次数睇齐。如果艾宁夏兰特继续保持呢个入球率，要破英超史上最高入球纪录完全唔系问题，甚至可以挑战英格兰顶级联赛史上最高1季60球嘅终极纪录！
22岁嘅夏兰特喺曼城如鱼得水，8场联赛狂入14球，成为英超史上首个连续3仗主场都演帽子戏法嘅球员。要喺英超入3球有几难？C朗拿度用8个球季232场联赛先有3次帽子戏法，杜奥巴、占美华迪、卢卡古、苏斯克查等射手，成个英超生涯都系试过3次「戴帽」，夏兰特只系8场联赛就同佢哋睇齐。
英超史上最高入球金靴，系高尔(93/94球)同舒利亚(94/95球季)共同保持嘅34球，但夏兰特依家场均入1.75球，如果可以保持呢个入球率，一季可以入66.5球！英格兰顶级联赛史上最强金靴，系1927/28球季爱华顿前锋迪斯甸恩，当时佢一季攻入60球。
