前皇马射手希古恩2年前加盟美职球队国际迈亚密之後，一度表现低迷，逐渐被人遗忘，但佢近期突然翻生，呢位34岁老将近4场美职都有波入，合共轰入5球，状态非常勇猛，难怪唔少网民建议阿根廷国家队主帅史卡朗尼重召希古恩，帮手争夺世界盃。
希古恩由7月开始，表现着晒火，近14场联赛有12球进帐，特别系近3场都喺比赛末段射入致胜1球，包括上仗踢到86分钟建功，协助国际迈亚密以1比0绝杀FC多伦多，令呢位曾经效力拿玻里、皇马、车路士、AC米兰、祖云达斯嘅着名射手，再次引起球迷关注，呼吁佢重返阿根廷国家队帮助美斯争夺世界盃。
希古恩喺2014年世界盃决赛错失单刀入波机会，成为阿根廷失冠罪人，受尽千夫所指，佢3年前已经宣布退出国家队，甚至打算今季美职结束後挂靴，睇怕球迷嘅愿望无法实现。
