利物浦喺夏季转会窗最後时刻，向祖云达斯借用巴西中场艾法美路，不过佢加盟後只系为一队踢过13分钟比赛，有传闻话领队高普对佢表现唔满意，将会喺1月「退货」。艾法美路经理人日前澄清，指利物浦对佢嘅状态进展好满意，更预告艾法美路即将回复100%状态，随时大爆发！
26岁嘅艾法美路今个国际赛期冇份入选巴西国家队，佢经理人柏斯杜尼路表示：「转会头几个星期，正常都系球员嘅恢复期，今次国际赛期佢放弃自己嘅假期，留喺利物浦进行特训，佢好快就会回复100%状态，球会对佢嘅进展非常满意。」
利物浦依家有拿比基达、居迪斯锺斯、阿历士张伯伦等中场伤兵，而且10月份仲要应付6场英超同3场欧联赛事，赛程非常紧密，艾法美路如果可以打起状态，对「红军」绝对系及时雨。
