曼城将於周日(2日)晚英超主场对曼联，全世界都等紧睇「蓝月亮」射手艾宁夏兰特点样摧残「红魔鬼」防线，但世事无绝对，因为曼联中坚利辛度马天尼斯被誉为「夏兰特克星」，曾於欧联彻底冻结呢位挪威入球机器，难怪曼城领队哥迪奥拿都承认夏兰特今场未必占到优势。
身高仅1米75嘅利辛度马天尼斯曾经被指唔适合喺英超踢中坚，因为面对高大前锋时，将会处於劣势。艾宁夏兰特唔止射术精湛，而且身高1米95，比马天尼斯高20厘米之多，被睇好今场「曼市打吡」可以辗压呢位阿根廷国脚。
不过，事实又未必系咁，因为两人曾於上年10月欧联分组赛交锋，当时效力阿积士嘅利辛度马天尼斯利用速度及企位，成功冻结当时踢紧多蒙特嘅艾宁夏兰特，协助阿积士大胜4比0。该仗比赛精华片段近日被曼联球迷放上网疯传，认为马天尼斯可以再次令夏兰特哑火。
曼城领队哥迪奥拿都话球员身高唔代表一切：「夏兰特比较高大系事实，但踢波唔系斗高，利辛度马天尼斯系一位优秀球员，精神力量强大，有侵略性，所以曼联愿意用高价签佢，坦哈格亦好了解佢，知道佢嘅实力。」至於今场矮仔斗高佬，边个会赢，大家拭目以待。
