C朗拿度今季喺曼联沦为後备，10场只入1球波嘅状态令人担心，随住葡萄牙喺欧国联出局，唔少球迷都将矛头指向C朗，甚至要求唔好再畀C朗打正选。对於葡萄牙球迷「打完斋唔要C朗」嘅行为，C朗家姐Katia Aveiro就发文向球迷开火，直斥佢哋忘恩负义。
葡萄牙输畀西班牙後，Katia Aveiro喺社交网发文炮轰葡萄牙球迷，而且言词相当尖锐：「无论咩情况，C朗都有家人同爱佢嘅人喺身边撑佢，不过依家嘅情况唔会令我惊讶，因为葡萄牙人就系锺意喺自己食紧嘢只碟吐口水......葡萄牙人就系病态、小器、愚蠢、忘恩负义，依家跪喺度嘅人系世界最佳球员C朗，但冇人会向佢伸出援手......」
C朗喺今个国际赛期，2场欧国联踢足180分钟都冇表现，当地媒体更提出「少啲C朗、多啲葡萄牙」嘅意见，希望国家队可以减C朗出场时间，增加番团队嘅合作，喺世界盃决赛周前先嚟「内斗」，随时会影响葡萄牙今届决赛周嘅表现。
