今季季初一度陷入球荒嘅孙兴民，喺「北伦敦打吡」作客阿仙奴前及时复苏，佢喺国际赛为南韩2度建功後，已经连续3场比赛有波入，而「老孙」喺南韩国家队再次展示罚球功架後，据报热刺或考虑更换罚球刽子手，畀孙兴民主射罚球。
南韩上星期友赛哥斯达黎加，孙兴民完场前轰入精彩罚球帮球队追和2比2，连同今年6月对巴拉圭、智利都分别罚球直射入波，佢近4个国家队入球有3个都系罚球建功。奇怪嘅系，孙兴民嘅罚球能力喺热刺一直被忽视，据《The Athletic》统计，孙兴民历来239次为热刺上阵，只有5次射罚球纪录。
最大问题系，热刺本身都冇罚球专家，过去5季热刺有124次罚球射门，但只有4次可以转化为入球，入球比率系英超第5低，入波嘅包括已离队嘅死球专家基斯甸艾历臣(2球)同捷比亚，另外1球就系孙兴民。包括热刺近5成罚球射门嘅哈利卡尼同艾历迪亚，合共59次主射1球都冇入到。
热刺今夏聘请意大利死球教练维奥加盟，有传为改善差劲嘅罚球纪录，热刺考虑更会罚球人选，虽然哈利卡尼向来唔放过任何入波机会，但佢热刺生涯唯一一次正式比赛罚球入波已经系2014年，而且仲喺省中人改变方向弹入，热刺更换刽子手嘅话，人选呼之欲出。
