欧国联4强正式出炉！周三(28日)凌晨欧国联分组赛煞科，A2组榜首大战，西班牙凭艾华路莫拉达完场前2分钟绝杀，作客1比0击败葡萄牙，成功以1分反压对手出线。西班牙将会同意大利、克罗地亚、荷兰争逐冠军，决赛圈会喺明年6月上演。
今场只要唔输就出线嘅葡萄牙，继续有C朗拿度挂帅，般奴费南迪斯、贝拿度施华等亦正选登场，西班牙虽然控制晒战局，但系创造嘅机会唔多，大部份时间都系闷战。比赛後段西班牙换人增加锋力，终於去到88分钟，後备上阵嘅尼高威廉斯头槌二传，艾华路莫拉达门前撞入，西班牙就凭呢个入波赢1比0。
一直被球迷视为「败家仔」嘅艾华路莫拉达，自安历基执教以来为国家队入13球，同费伦托利斯并列同期第1位，包括上年欧国盃4强绝地逼和意大利、上年底世盃外绝杀瑞典出线决赛周，今场又一次绝杀率球队晋级，佢赛後表示：「我冇压力，代表西班牙系有啲紧张，我哋系支优秀嘅团队，绝对配得上赢波。」
上届欧国联决赛饮恨，西班牙领队安历基认为今次晋级对世盃亦有帮助：「今场系好大嘅激励，球员以更好状态迎接世界盃，呢场赛事证明西班牙系一支难以击败嘅球队，你要有超级表现先可以赢西班牙。」
