葡萄牙喺欧国联0比1不敌西班牙，将出线权拱手双让，呢场波葡萄牙几次黄金机会都出现喺C朗身上，但佢继续今季超级唔顺嘅脚风，再一次「食白果」收场。C朗完场後心情极差，怒掟队长臂章泄愤，但呢个做法亦引嚟球迷批评，认为系对国家队唔尊重。
葡萄牙上仗大炒捷克4球，C朗冇份入波，今场佢再次正选踢足90分钟，仍然都系「食白果」，今季喺球会同国家队10场比赛只入过1球12码，同以往单天保至尊嘅霸气完全唔同。C朗今场有2次射门被救，亦有一次喺禁区无人看管下，因太「淡定」而被对手及时解围，最终更被西班牙绝杀而输波。
C朗完场後心情极差，除低个队长臂章直接掟走，有球迷指出佢已经至少第3次攞国家队队长臂章嚟发泄，呢个做法非常唔尊重。葡萄牙领队费兰度山度士赛後表示：「我哋希望出线，所以球员赛後都好失望，今场我哋有几次入波机会，C朗正常嚟讲会把握到，但我哋会继续坚持多年嚟建立嘅踢法。」
