阿根廷球会贝格拉诺上星期提前锁定乙组冠军，下季得以升上阿甲逐鹿，球队随即举行开蓬巴士胜利巡游，畀球迷同球员尽情庆祝，势估唔到胜利巡游竟然系死亡陷阱！当时开篷巴士高速穿过一条仅仅够高通过嘅天桥，巴士上层球员千钧一发下及时缩低，逃过集体「斩头」命运，惊心片段亦喺网上疯传。
老牌球会贝格拉诺喺2019年降班乙组，佢哋周一(26日)作客3比2击败布朗竞技後，即提前锁定冠军兼升班资格，球队即刻安排胜利巡游庆祝，总共15公里嘅路程都有大批球迷参与欢，几乎所有球员都喺巴士上层狂欢兼向球迷致谢，有人坐栏杆边、有人挥舞旗帜，场面非常热闹。
就喺大家热烈庆祝期间，突然有多位球迷尖叫提醒球员小心，原来巴士即将穿过一条天桥，但天桥高度同巴士顶部只有几寸距离，而且当时车速亦唔算慢，好在一班球员反应够快，顶层所有人同一时间缩低，而且桥底设计亦系「渐进式」收窄，令球员有足够时间避开，真系「险过剃头」。
呢场惊吓影片随即被球迷疯传，大批粉丝留言批评负责制定巡游路线嘅人「收买人命」：「谂呢条巡游路线嘅人应该炒鱿」、「X！个巴士司机应该被炒」、「好癫！冇人喺呢件事入面受伤真系非常幸运」。
