法国周一(26日)凌晨欧国联A1组赛事，作客惨吞丹麦2蛋，好在奥地利喺另一边亦都输波收场，令法国喺小组6场只得1胜下，仍以1分力压奥地利「护级」成功。对於法国今场落败，领队迪甘斯就话唔使担心，表明当一众主力复出後，世盃表现会截然不同。
法国今仗继续用基利安麦巴比、基沙文同基奥特组成三叉戟，但中後场就有大量新人，结果上半场被多尔贝治同安达斯奥臣攻陷，半场落後0比2。法国前锋基利安麦巴比今场有5次射门4次中龙，但面对「上身」嘅卡斯柏舒米高亦无能为力，法国最终输0比2。
法国同丹麦喺世盃分组赛亦系同组，今场败仗令人担心法国前景，不过迪甘斯就表示：「我唔认为法国沉沦，今场我哋用咗好多年轻球员，大部份都欠缺顶尖国际赛经验，我哋唔需要太忧心，当一班经验丰富嘅主力回归，法国就会变番正常。」法国今场缺少门将洛里斯、中坚华拉尼、中场保罗普巴同前锋宾施马，4人都系迪甘斯心目中嘅正选。
