曼城喺夏天转会窗完结前，用1,500万镑收购多蒙特中坚文路尔艾简治，呢位瑞士国脚一加盟即抢占正选位置，上场欧国联更带领瑞士爆冷击败西班牙，难怪被英国传媒誉为「今夏最抵玩收购」。
27岁嘅艾简治加盟曼城後，立即连续3场正选帮球队3连胜，强势亦持续去到国家队，上仗作客西班牙嘅欧国联，艾简治喺2次角球攻势建奇功，先系直接顶入，再嚟就头槌二传队友入波。艾简治表示：「我嘅速度、体能同头槌都唔错，但我认为自己最大长处系预判能力，呢一点亦系哥迪奥拿对我有信心嘅原因。」
艾简治喺曼城极速企稳阵脚後，被问到预期年底世界盃决赛周会有咩成绩，呢位瑞士人气球星表示：「冇人知道呢次旅程终点喺边度，不过我相信瑞士可以有好高成就，冇错，我想帮瑞士捧世界盃冠军！」
