法国上仗欧国联以2比0击败奥地利，摆脱榜尾位置，护级成功机会大增，该仗射入1球及1次助攻嘅基奥特表现备受好评，但领队迪甘斯却泼冷水，指呢位即将36岁嘅前锋唔一定可以入选参加今届世界盃嘅大军名单。
迪甘斯话：「我为基奥特有出色表现，感到高兴，佢喺球会度过艰难时期，每次踢国家队都有精彩演出，但佢必须继续保持水准先至得，我冇讲过佢一定可以同球队去卡塔尔踢世界盃，法国队所有位置竞争都非常激烈，我需要时间考虑。」
事实上，基奥特上仗可以踢正选，好大程度上由於主力射手宾施马受伤冇入选，一旦呢位皇马前锋归队，基奥特能否占国家队一席位仍属疑问。
法国舆论普遍认为基奥特同基利安麦巴比非常合拍，因为两人风格唔同，可以互补长短，反而宾施马同麦巴比类型较似，位置有重叠之嫌。
同埋基奥特国际赛已累积入49球，只差2球，就可以追平亨利保持嘅法国队最多入球纪录，法国球迷都希望佢可以喺世界盃打破纪录，至於迪甘斯会唔会听取民意，大家拭目以待。
