英国传媒爆料，曼联今夏领队交替期间，上任看守领队兰历克曾与新上任嘅坦哈格交换意见，给予增援建议，列出5人增援名单，该5人名单当中就包括艾宁夏兰特，但曼联一个都冇考虑，依家睇番都几揼心。
虽然兰历克喺曼联教波成绩麻麻，但佢睇人眼光独到，今年初接任初期就曾表示「曼联要换10个球员」，後来佢卸任领队职位，准备转当顾问，亦有同坦哈格交流畀意见，而且建议增援名单个个猛料，人选计有：艾宁夏兰特、曹亚文尼、RB莱比锡三宝尼干古、干拉特赖马，同埋加华度尔。但坦哈格眼中只有法兰基迪庄，兰Sir嘅提议一个都冇要。
艾宁夏兰特唔使多介绍，佢今夏加盟曼城立即爆发，开季至今各项赛事入咗14球，多过曼联全队入球总数，至於曹亚文尼，当曼联签入卡斯米路之後，呢位法国小将直接出任皇马中场核心，成功换班，证明能力上乘，仲有极佳发展潜力。
至於RB莱比锡三宝尼干古、干拉特赖马、加华度尔仲可以斟介，不过曼联因为超支已宣布闩水喉，无力出手。
