周六(24日)凌晨欧国联A3组大战，英格兰作客0比1不敌意大利，提早1轮笃定降班，下届只能参加B组级别赛事，对於呢支星光熠熠嘅球队而言，绝对系一大耻辱。
英军主帅修夫基今仗派出哈利马古尼踢正选，呢位曼联中坚今季各项赛事4次正选上阵，所属球队都输波，成为大黑脚，难怪要求修夫基弃用马古尼嘅声音愈来愈大。
赛前4战不胜排包尾嘅英格兰今仗必须赢波，先至有机会护级成功，但球员表现毫无斗志，开波初段被对手压住来打。意大利前锋施卡马卡头顶脚踢，创造2次甚具威胁嘅攻门，英格兰有祖迪比宁咸、哈利卡尼射门无功而还。
踢到68分钟，意大利22岁新星拉斯柏度尼喺禁区边射入世界波，凭呢个入球以1比0击败英格兰，追至落後榜首匈牙利2分，双方将於下轮交锋，决定出线资格主谁属。
反观，英格兰踢咗5场只有2分，落後第3位德国4分，即使下仗击败德国，亦无法摆脱榜尾位置，已肯定提早降班。
英格兰嘅低迷表现，亦令人疑怀球队能否喺11月下旬展开嘅世界盃交出好成绩，特别系主帅修夫基执意重用哈利马古尼，但呢位後衞今季已失去曼联正选位置，状态不足，加上非常黑仔，今季2场英超及1欧霸盃踢正选，曼联都输波，佢今仗欧国联担正，英格兰更加输波兼降班，如果英格兰继续由呢位黑脚做正选，恐怕世界盃前景唔乐观。
