英格兰近年人才辈出，每个位置都有唔少球星可以选择，唯独前锋哈利卡尼嘅地位无可取代，不过英格兰今次欧国联首次徵召艾云东尼，前国脚希斯基就大赞修夫基「识货」，直指呢位宾福特射手系哈利卡尼最佳接班人。
哈利卡尼除咗入波多之外，堕後校炮亦系佢一大卖点，英格兰近年嘅後备前锋好似卡维特利云、奥尼屈坚斯、谭美阿巴谦等都唔系呢种类型，艾云东尼今季7场联赛有5入波同2助攻，希斯基就表示：「艾云东尼踢得好有信心，佢同哈利卡尼风格好似，经常会返中场帮手连系，亦可以杀入禁区攻门。」
26岁嘅艾云东尼，妈妈有牙买加血统，早喺2年前开始，牙买加就至少3次邀请佢加入，不过当时仲喺英冠嘅艾云东尼，已经决心要踢英格兰国家队，所以一直拒绝牙买加足总，今次入选英格兰证明皇天不负有心人，艾云东尼将以出战年底世界盃决赛周为目标。
