转会专家Fabrizio Romano披露，C朗转投拜仁慕尼黑出现转机，原因系拜仁近期成绩下滑，开始重新考虑签入C朗，而转会操作将於世盃後启动，明年1月转会市场重开期间实行。
C朗经理人佐治文迪斯今夏多次与拜仁接触，但都被拜仁拒绝，不过依家情况有变，Fabrizio Romano表示：「对於拜仁嚟讲，今个球季情况好差，我可以忽略关於杜曹执教嘅传言，拜仁正在发动董事局去力保拿高斯文，以否认换帅传闻。」
佢继续话：「任何球会都想签入罗拔利云度夫斯基呢类前锋，咁都好正常，我认为C朗系代替『罗拔佬』嘅最佳人选，但我都理解拜仁一向秉持嘅转会政策。」
由於Fabrizio Romano喺欧洲转会市场有一定影响力，佢亦经常披露许多转会内幕，上述言论即时引起球迷讨论，有球迷认为对於曼联、拜仁同C朗系三赢局面，但亦有人质疑拜仁会否签入快将38岁嘅C朗。
