曼联法国前锋安东尼马迪尔喺季前热身赛踢到识飞，但未开季就受伤，早前「双红会」对利物浦一度复出，但之後又伤过，一直无法持续上阵，原来系因为佢嘅脚伤无法断尾，有伤病专家警告，再唔正视问题，马迪尔生涯随时系咁先。
建立英超球员伤病纪录网站嘅伤病专家Dinnery表示，马迪尔嘅伤势可能超出预期，比想像中严重，反覆受伤令佢伤势不断加重，最严重将影响往後比赛生涯。分析指出，马迪尔持续出现脚筋拉伤、跟腱软组织拉伤等问题，伤病不断累积加重，由於曼联只对佢采用较保守方式治疗，无法根治旧患，令佢极容易再度受伤，变成玻璃脚。
除咗不断受伤，旧患更严重影响马迪尔嘅柔韧性同爆发力，对佢速度、转身、冲刺同灵活性都有所影响，事实证明，马迪尔於曼联早期入球率甚为稳定，试过1季入23球，但近年入球率暴跌，正是伤患令佢无法大范围跑动，状态下滑。
Dinnery建议，曼联应该为马迪尔安排一次手术，将佢嘅旧患彻底根治，回复健康，因为马迪尔系一名有质素前锋，佢早前喺「双红会」上阵短短半场就创造4次过人数据，至今仍然系曼联今季单场过人次数最多嘅球员，如果佢就此打柴，实在可惜。
