挪威前锋艾宁夏兰特今季喺曼城大爆发，9场比赛狂入14球，不过呢位射手近年有唔少伤患问题，依家夏兰特已返挪威备战欧国联对斯洛文尼亚同塞尔维亚，曼城为确保呢位前锋嘅健康，竟然借埋军医畀挪威国家队，专责睇住夏兰特嘅健康情况！
夏兰特上季喺多蒙特受伤一大轮，曼城今季为佢特别制订训练计划，开季以嚟一直运作畅顺，为免佢喺国家队因更改训练模式而「出事」，曼城就借出理疗师柏芬迪畀挪威，摆到明系夏兰特嘅「专门军医」。
挪威领队苏巴根证实柏芬迪加入嘅消息，形容佢系国家队「第3个理疗师」，不过就否认柏芬迪只会为夏兰特服务。据报曼城希望同挪威足总建立良好合作关系，始终确保夏兰特身体健康，对曼城同挪威国家队都系百利而无一害。
