摩连奴执教罗马期间，经常留意住旧东家曼联情况，一见合用球员就会出手，最新一位魔兵佢睇中域陀连迪路夫，打算喺明年1月冬季转会市场斟介。
连迪路夫系「寸王」执教曼联时期，於2017年由宾菲加签入，花费3000万镑，几年来连迪路夫喺曼联浮浮沉沉，苏斯克查时期一度同哈利马古尼成为正选双中坚之一，但之後曼联经历动荡，连迪路夫亦失去正选席位。
曼联今季由坦哈格执教，双中坚系华拉尼拍利辛度马天尼斯，哈利马古尼系第一後备，连迪路夫只能喺欧霸盃上阵，但要客串右闸，发展极不如意。
意大利转会专家Rudy Galetti报道，摩连奴今季为罗马物色中坚多时，但一直搵唔到合心水人选，嚟紧冬季转会窗，摩帅有3个选择，分别系车路士嘅杜利奥查洛巴、热刺嘅坦根加，同埋连迪路夫。由於连迪路夫曾经跟过摩连奴搵食，佢又同罗马现役中坚基斯史摩宁曾在曼联合作过，所以连迪路夫将会系摩帅引援首选。
