西班牙国家队主帅安历基公布新一期大军名单,曼联门将迪基亚再次落选,佢已经10个月未曾晋身国家队,距离今届世界盃决赛周举行日子愈来愈近,似乎安历基已无意徵召呢位31岁钢门出战世界盃。
西班牙今次名单上3位门将,包括毕尔包嘅乌尼西蒙、白礼顿门将罗拔山齐士、宾福特门将大衞拉耶。同样喺英超搵食,安历基宁愿拣效力细球会嘅罗拔山齐士、大衞拉耶,都唔要迪基亚,就知佢已经放弃呢位名将。
迪基亚踢对上一次入选西班牙,已经系上年11月对瑞典,由此推断,佢参加今届世界盃机会非常渺茫。
至於其余常规主力都有入选,巴塞隆拿占咗6人,比较令人意外系安历基召入两位从未为国家队上阵嘅球员,包括29岁嘅贝迪斯前锋保查艾利斯亚斯、20岁嘅毕尔包前锋尼高威廉斯。
西班牙将於9月25日凌晨欧国联对瑞士、9月28日凌晨对葡萄牙。