周四(15日)凌晨欧联H组，巴黎圣日耳门(PSG)「MNM」锋线大发神威，美斯、基利安麦巴比、尼马各入1球，作客以3比1击败海法马卡比。阿根廷球王美斯首次喺欧联射入海法马卡比大门，令佢喺呢项赛事累积攻入39支唔同球队，超越C朗，独占第一位。
巴黎圣日耳门上半场24分钟意外先失波，但好快就由美斯射入扳平，呢位35岁老将下半场妙传畀基利安麦巴比射入反超前。
值得一提，今仗系麦巴比第46次为PSG踢欧联，成为球队史上欧联上阵次数最多嘅法国球员，亦系首位连续6场欧联入波嘅法国球员。临完场前，尼马突破越位射成3比1。
「MNM」锋线一齐入波，当中以美斯表现最出色，活动范围非常大，全场有78次触球，54次传球有49次成功交畀队友，4次尝试扭过对手有3次成功，加上入1球及1次助攻。
比赛之前，美斯同C朗一样喺欧联累积射入38支唔同球队大门，并列第一位，美斯今场入波後，将纪录改写为39队，由於C朗今届冇份踢欧联，变相冇得追，难怪佢今夏咁想离开曼联。
