世界盃决赛周展开前2个月，厄瓜多尔嘅参赛资格出现疑问，智利足总指控厄瓜多尔喺世盃外派出违规球员上阵，国脚拜朗卡斯迪路其实系哥伦比亚人，透过虚假出生证明获得厄瓜多尔公民资格，英国《每日邮报》日前公开爆炸性录音，卡斯迪路曾亲口「认罪」，国际足协(FIFA)已向厄瓜多尔发出书信，要求卡斯迪路喺周四(15日)嘅上诉仲裁会议中出席作供。
提出诉讼嘅智利足总，证实FIFA系喺新证据出现後，临时要求厄瓜多尔确保卡斯迪路出席聆讯，智利足总主席美拉特表示：「呢段录音证明我哋嘅指控系正确，由球员亲口承认系最有力证据，我希望卡斯迪路会出席，亦相信佢唔可能推翻自己过去讲过嘅说话。」
至於卡斯迪路嘅律师贺古恩就指出，由於呢段录音证据并冇喺最早嘅聆讯出现，所以今次上诉仲裁亦唔应该采用。根据呢段2018年嘅录音口供，卡斯迪路承认自己厄瓜多尔出世纸上嘅名、年龄、出生地都系伪造。
