热刺喺欧联输畀士砵亭，尝到今季首场败仗，状态低迷嘅南韩前锋孙兴民虽然继续正选上阵，但表现全无起色，呢位英超金靴今仗更交出0射门嘅耻辱数据，连名将荷度都话睇得出佢信心尽失。赛前领队干地话会考虑将孙兴民贬做後备，今场之後似乎要坐言起行。
孙兴民上季大放异彩，成为英超史上第1个亚洲金靴，点知今季表现判若两人，开季8场比赛场场正选上阵，但就交出0入波、1助攻成绩，唯一助攻仲系喺英超开锣战交出。孙兴民今场对士砵亭0射门，5次扭波只得2次成功、5次传中全部交失，结果72分钟就被换人。
热刺名将荷度表示：「我认为孙兴民系好好嘅球员，但佢真系踢得好差，每次拎波都好担心会控唔好，如果系一个有信心嘅球员，佢拎波前应该谂紧下一步要点做，而唔系好似孙兴民依家咁样。」干地赛前强调球队冇必然正选，踢得唔好就要做後备，矛头直指孙兴民。
