今夏转会市场传得最多嘅两大主角，C朗同法兰基迪庄，最终都未能转会，继续留在所属球队曼联同巴塞隆拿，传媒估计嚟紧冬季转会窗重开期间，佢两个将继续成为焦点，转会闹剧继续上演。
先讲C朗，英国《太阳报》分析指出，C朗现於曼联沦为後备，虽然系R1，但对於该葡萄牙巨星嚟讲仍然无法接受，不过由於佢缺席季前集训，加上无法适应坦哈格战术，喺速度同踢法上未能配合球队，现时C朗喺英超只系後备，下半场入替时通常都系垃圾时间，作用可有可无，即使喺欧霸盃正选上阵，表现亦大不如前。
报道指做惯大哥嘅C朗无法安於现状，今个冬窗势必再度要求转会，下一站好大机会系车路士，其实今夏C朗经理人同车仔班主保利已经倾妥，可惜遭杜曹反对而未能成事，依家杜曹已经被炒，新帅朴达相信唔会否决老板决定，C朗过档车路士预计可顺利进行。
至於法兰基迪庄，巴塞隆拿一直想将呢位贵价荷兰国脚出售，以减轻财政负担，今夏原本同曼联达成6300万镑转会初始协议，但因欠薪问题搁置，前後拖咗两个月，成为转会闹剧，但巴塞仍然死心不息，打算喺冬窗再度嚐试，到时曼联将再度报价。
