法国前锋安东尼马迪尔效力曼联7年，表现一直令人失望，今季喺新帅坦哈格手上有翻生迹象，传闻球会更想同佢续约。安东尼马迪尔日前接受法国媒体访问，就翻旧帐清算2位前领队，怒插摩连奴同苏斯克查「背信弃义」。
安东尼马迪尔对2016年被摩连奴褫夺9号波衫耿耿於怀：「暑假嗰阵摩连奴打畀我，问我有冇兴趣转11号，又话杰斯都系呢个冧把，我同佢讲我好尊敬杰斯，但就唔想转号码，结果归队後我先发现自己已被转去11号，摩连奴完全冇尊重过我。」安东尼马迪尔仲闹摩连奴坚持用阿历斯山齐士，累佢错失入选法国踢世界盃嘅机会，更难受嘅系法国最终捧盃，原本应该入选嘅安东尼马迪尔只能做观众。
对於苏斯克查，安东尼马迪尔同样不满：「其他人唔知道，我喺疫情球季之後因为受伤，有4个月唔能够加速，但苏斯克查话球队需要我，所有我就顶硬上，咁嘅情况我点会踢得好？好多球迷不断批评我，但苏斯克查完全冇帮我解释过，我觉得好唔公平，苏斯克查背叛咗我，佢系背信弃义！」
