阿仙奴周五(9日)凌晨喺欧霸盃A组，作客2比1击败FC苏黎世，今夏加盟嘅巴西19岁小将马昆奴斯，今仗首度登场即有突出表现，1入波加1助攻成为球队赢波最大功臣，呢位小朋友入波後激动到跪地痛哭，前途一片光明。
阿仙奴今场收起多位正选主力，由圣保罗加盟嘅马昆奴斯就首度上阵，「兵工厂」今仗控制晒战局，16分钟法比奥韦拉後场交出直线，尼基迪奥传中畀马昆奴斯劲射入网，完半场前FC苏黎世喺角球混战博到12码，由基尔斯奥射入追平。62分钟马昆奴斯右路传中，尼基迪亚飞顶入网，阿仙奴最终赢2比1完场。
转会费只系300万镑嘅马昆奴斯今场创造历史，佢系阿仙奴近41年来，第一个喺欧洲赛首演即入波球员，对上一个要数到1981年嘅美亚迪，呢位青训产品当时喺欧洲足协盃首演对彭拿典奈高斯入波。
