车路士周四(8日)凌晨宣布，聘请白礼顿主帅朴达接掌帅印，双方签约5年，系车路士史上最长嘅领队合约，据报年薪高达1,200万镑，比起曼联新帅坦哈格嘅900万镑更高，喺英超领队薪酬榜排第4位，足见车路士对佢嘅信任。
车路士炒杜曹後火速斟掂朴达，并向白礼顿支付1,600万镑「赎身费」，呢位47岁英格兰教头表示：「我兴奋可以同车路士新嘅领导层合作，亦好期待同队中球员一齐工作，一齐建立出足以令球迷光荣嘅新文化。」朴达今次仲会带埋4位白礼顿教练团一齐过档，周五(9日)就会展开领军工作。
朴达系教瑞典球会奥斯达辛斯起家，只系执教史云斯同白礼顿都受到好评，今次挑战豪门车路士，人工亦都三级跳，由原本250万镑年薪大增至1,200万镑，排英超第4位，重点系佢今次签署5年长约，意味如果佢可以顺利教完5年，总收入达6,000万镑。
英超领队薪酬榜
排名●领队(球会)●年薪
1●哥迪奥拿(曼城)●1,900万镑
2●高普(利物浦)●1,600万镑
3●干地(热刺)●1,500万镑
4●朴达(车路士)●1,200万镑
5●罗渣士(李斯特城)●1,000万镑
6●坦哈格(曼联)●900万镑
7●阿迪达(阿仙奴)●830万镑
8●夏辛侯迪(修咸顿)●700万镑
9●林柏特(爱华顿)●600万镑
