波黑足总周五(10日)宣布，将约战被制裁嘅俄罗斯进行友赛，但赛事未获该国球员同球迷支持，纷纷表态反对，反对最激烈系队长比真历。
报道指，波黑足总经过投票通过与俄罗斯友赛，共有5票赞成、1票反对，不过消息传出後引来一片抗议之声，波黑球迷呼吁抵制赛事，有激进球迷甚至要求解散足总。
波黑球员当中，比真历系第一个企出嚟反对，佢近日离开巴塞隆拿，转会到阿联酋球队沙迦。对今次事件，佢话：「佢哋打电话畀我，问我对今场比赛睇法，我讲咗我嘅立场，然後佢哋做出一个唔同嘅决定。」
比真历继续话：「我真系冇说话好讲，当国家队有起色嗰阵，总系会出问题，足总知道我嘅睇法，我唔会踢呢场比赛。」
自俄乌爆发战争以来，俄罗斯受到国际足协同欧洲足协制裁，就连世盃外亦被禁赛，波黑足总竟然有咁嘅决定，令人费解。
