转会窗已关闭，但曼联仲有机会增兵，据报佢哋多年前斟过嘅哥伦比亚右闸辛迪亚高阿里亚斯近日回复自由身，会方准备开出一纸700万欧元嘅两年合约，签佢番嚟做後备。
曼联右闸已经有达洛治同云比沙卡，不过云比沙卡似乎唔系坦哈格杯茶，上场欧霸盃临开赛前被掟上台，後备都唔使做，依家可以签到阿里亚斯补充右闸，相信会方将尽快采取行动。
现年30岁嘅阿里亚斯系2018年哥伦比亚世盃国脚，不过佢喺马体会失去正选席位，近年经历外借生涯，先後外借到利华古逊同CF格兰纳达，今年8月同马体会解约回复自由身。
翻查纪录，原来早在阿里亚斯仍效力燕豪芬时期，曼联曾经对佢有兴趣，事隔多年後，虽然阿里亚斯已经30岁，近年发展亦不如意，但依家曼联有机会签到佢，价钱又唔系贵，不妨一试。
