英超劲旅车路士周一(5日)宣布，22岁右闸列斯占士同球会续约6年，合约去到2028年先至完结。据报新合约周薪高达25万镑，令佢成为车路士史上最高薪後衞，亦系当今球坛第2高薪闸位球员。
英国《每日邮报》报道，车路士班主保利推行新政策，向25岁以下球员开出6年至7年长约，好似新加盟嘅韦斯利科芬拿就签约7年，古古列拿、布查等就同列斯占士一样签约6年。列斯占士续约後表示：「我开心到飞起，要多谢新班望同球会所有人，我6岁已经支持车路士，续约系因为呢度系我想踢波嘅地方，我相信未来几年会有机会赢好多奖盃。」
列斯占士新约周薪达25万镑，系球会史上最高人工後衞，而环顾现今球坛嘅闸位球员，只有巴塞隆拿左闸佐迪艾巴(35万镑周薪)比佢更高人工，而列斯占士嘅队友古古列拿(17.5万镑周薪)同芝维尔(19万镑周薪)，都系当今10大最高薪闸位球员之一。
