曼联周一(5日)公布欧霸盃分组赛名单，安东尼马菲奥斯、卡斯米路、基斯甸艾历臣、利辛度马天尼斯等新兵当然上榜，不过「红魔鬼」依家就有人满之患，菲尔锺斯同班顿威廉斯唔单止落选，据报佢哋连更衣室个储物柜都被清埋，依家只可以去U23更衣室。
30岁嘅菲尔锺斯同曼联仲有1年合约，佢过去4季只系帮球队踢过13场比赛，季前热身开始一直养伤；22岁左闸班顿威廉斯前季弹起，上季就外借诺域治，不过返嚟之後未获领队坦哈格信任，所以曼联宁愿注册受伤嘅杜安薛比都唔要佢。
菲尔锺斯同班顿威廉斯冇份踢欧霸盃并唔意外，但据英国《太阳报》报道，由於曼联嘅卡宁顿训练基地更衣室只能容纳24个球员，所以2人嘅Locker都被没收，依家连一队更衣室都冇得入，要「暂住」喺U23嘅更衣室，认真阴公。
