拥有多位前英超兵嘅法甲球队尼斯，周一(5日)官方宣布签入自由身嘅英格兰中场巴克里，令该队嘅英超阵容进一步壮大，成阵英超味。
28岁嘅巴克里系前英格兰世盃国脚，曾效力爱华顿、阿士东维拉及车路士，上季煞科日为车路士第100次上阵，当时对屈福特攻入致胜球，亦系阿布拉莫域年代结束前最後一球。今季同车路士解约後回复自由身，最终佢选择去法甲发展，加盟好多前英超兵嘅尼斯。
讲起尼斯人脚，今季由李斯特城签入卡斯柏舒米高、阿仙奴嘅尼高拉斯比比，仲有踢过英超嘅艾朗蓝斯、前曼联嘅舒尼达连、前修咸顿嘅勒美拿、前富咸中场祖拜仁、宾福特借将柏治苏连逊等，加埋巴克里，尼斯嘅前英超阵容相当鼎盛。
尼斯今季都多比赛，除咗法甲，仲会参加欧洲协会联赛，佢哋喺D组，对手有科隆、柏迪逊同斯洛华高，值得英超迷留意。
