狼队喺转会窗完结前，用1,500万镑签入奥地利前锋沙沙卡拉积锡，不过呢位射手日前对修咸顿首演，只系踢咗半场就受伤被换，经军医检查後发现膝部韧带重伤，传闻好大机会提早收咧。狼队亦即刻做嘢，倾掂自由身嘅迪亚高哥斯达，佢周二(6日)会飞英国做体测并正式签约。
狼队前锋鲁尔占美尼斯一直受伤患困扰，所以球队重金签入沙沙卡拉积锡，估唔到第1场波就重伤。狼队官方声明表示：「沙沙卡拉积锡半场觉得膝头不适，好不幸，检查证实佢膝头前十字韧带受伤，嚟紧会再接受专家诊治，我哋会喺佢康复路上作出支持。」
消息指沙沙卡拉积锡将会提早收咧，而狼队已经联络今年初同明尼路解约嘅迪亚高哥斯达，呢位33岁前锋曾效力过车路士3年，今次重返英超并唔陌生。
