22岁嘅安东尼马菲奥斯将由阿积士加盟曼联，有舆论指佢未够成熟，可能难以适应英超，但其实呢位巴西国脚一早已经「熟透」，年仅19岁就做咗爸爸，亦曾经写过一本书，可以话系动静皆宜。
安东尼马菲奥斯喺巴西圣保罗出世，10岁加入当地劲旅圣保罗青年军，4年前升上一队後表现出色，随即引来欧洲球会垂青，曼城、爱华顿当时已经想签佢，但被阿积士捷足先登，2020年2月以1,300万镑买入呢位新星。
荷兰名宿云巴士顿曾经批评阿积士签安东尼嘅交易系不智，因为呢支荷甲劲旅一向以青训出色见称，冇必要高价收购球员。不过，仅过2年半，安东尼身价已暴涨至8,400万镑，令云巴士顿跌烂眼镜。
另外，安东尼马菲奥斯有份协助巴西夺得上年东京奥运男足金牌，亦曾为巴西国家队上阵9次入2球，相信会成为「森巴兵团」争夺今届世界盃嘅主力。
