曼联喺英超反弹连赢2场後，转会市场亦再传「捷报」，据多个可靠媒体报道，曼联已成功用1亿欧元收购阿积士翼锋安东尼马菲奥斯，呢位巴西国脚嘅经理人周一(29日)凌晨亦喺IG留言：「Here we go！」暗示交易已经落实。
权威记者Fabrizio Romano报道：「曼联同阿积士已达成共识，转会费1亿欧元，合约去到2027年，有延长1年合约条款，听日(周一)会正式签约。合约已经预备好晒，转会费会打破荷甲纪录，安东尼马菲奥斯将会去曼联。」呢位22岁翼锋嘅经理人比杜素，周一亦喺IG贴上飞机emoji，留言象徵「转会落实」嘅字句「Here we go！」。
安东尼马菲奥斯已罢操罢踢多日，阿积士周日(28日)作客2比0赢乌德勒支前，教练舒鲁达亦表示：「所有嘢都系由金钱决定，实在好可悲，但呢个就系我哋嘅世界，我唔同意又点，现实就系咁可悲。」
