热刺今季英超开局成绩理想，不过以5,000万镑转会费加盟嘅李察利臣，只系试过3次後备上阵，转会後仍然未入过波。呢位巴西国脚周一(29日)凌晨对诺定咸森林一仗，比赛尾段不忘卖弄脚法，喺边线大玩花式的波，结果被班兰庄逊「辣低」。
尼马等巴西球员向来锺意Show Off，李察利臣今场74分钟入替孙兴民後，热刺冇几耐就赢到2比0，眼见3分差唔多到手，李察利臣就开始玩嘢，85分钟喺进攻左路边线接波後，突然大玩花式「的波」，弹住咁原地连「的」4下之後再交波，当佢再接应回传後，森林嘅班兰庄逊就第1时间凶狠将佢扫低，结果换嚟1张黄牌。
评述嘅利物浦名将加历查表示：「哗！李察利臣就系想挑衅对手，你唔可以咁做，但睇下佢做咗咩？佢成功激嬲对手，亦都激嬲埋我，班兰庄逊可以点？你预期班兰庄逊会由得佢喺到咁样做？」加历查同李察利臣早有牙齿印，上季加历查曾怒插李察利臣插水做戏，李察利臣就反寸加历查「口臭」同「唔值得尊重」。
