车路士今个暑假买人积极，不过收购目标就受到唔少球迷质疑，尤其多年来负责转会嘅「铁娘子」玛莲娜跟随阿布拉莫域离开，新总监亦未上场，搞到美国班主保利要亲自上阵，搵人、谈判一脚踢，可惜效果吃力不讨好，加利尼维利亦炮轰：「保利当自己玩紧《Football Manager》！」
加利尼维利日前喺佢自己网上节目表示：「呢个美国班主当自己玩紧《Football Manager》，好似好紧张咁四围走，突然走去斟法兰基迪庄，感觉就系要话畀人听『我做紧嘢』，如果佢留用番之前嘅人，就唔使承受呢啲压力。」
车路士原本目标系2个中坚、前锋、翼锋同防守中场，但拉芬夏比洛尼、祖利斯古迪等主要猎物都被巴塞隆拿抢走，结果保利未有Plan B，反而走去高价收购计划以外嘅球员，包括抢曼城目标古古列拿、曼联目标法兰基迪庄等等，又曾经想收购C朗拿度作为「王牌收购」，只系最後被领队杜曹否决。
