曼联上仗英超能够击败利物浦，好大程度上由於球员一改懒散态度，不惜气力跑动压迫，红魔鬼之所以有呢个改变，要多得领队坦哈格早前惩罚球员跑13.8公里加操，但其实佢自己亦以身作则，跑埋一份，惩罚球员嘅同时，亦惩罚自己，获得英国传媒赞赏。
曼联早前0比4大败於宾福特脚下之後第2日，坦哈格惩罚球员跑13.8公里，因为红魔鬼该仗比宾福特球员跑少13.8公里。消息人士指坦哈格当时带队一齐跑，换言之呢位52岁荷兰名帅都跑咗13.8公里，球员自然唔敢偷懒。
呢招果然立竿见影，曼联上仗对利物浦，全队跑咗113.79公里，利物浦球员跑110.6公里，红魔鬼仲有155次冲刺，比对手多51次。曼联球员比赛时交足功课，就唔使再畀坦哈格罚跑啦。
