曼联可以击败利物浦，後衞利辛度马天尼斯居功厥伟，呢位身高仅1米75嘅中坚今季成「魔」後，被嘲讽太矮，难以喺英超立足，但佢今仗以近乎完美嘅表现，证明自己系世界一级中坚，唔止多次瓦解对手攻势，甚至救出队友般奴费南迪斯嘅「乌龙射门」，名副其实系一夫当关，万夫莫敌。
曼联早前0比4大败於宾福特一役，利辛度马天尼斯先天不足，被对手用高空波恰死，结果踢完上半场就被换走。
不过，主帅坦哈格今场「双红会」仍然畀呢位24岁阿根廷国脚踢正选，佢不负所望，表现神勇，包括上半场40分钟喺白界线上，挡出般奴费南迪斯嘅近门「乌龙劲射」，否则已被利物浦扳平，到时胜负难料。
除此之外，利辛度马天尼斯今场仲有7次解围、3次封阻射门、1次拦截、1次抢波，5次地面对抗赢2次，只有2次犯规，佢同华拉尼合作扼守中坚，效果好过拍住哈利马古尼，进一步加强坦哈格弃用马古尼嘅决心。
