曼联主场击败利物浦，令「红军」球迷相当冇瘾，而当中最冇瘾嘅非名宿加历查莫属，佢同坚尼、加利尼维利2位曼联传奇一齐直播呢场大战，开波前更搵到C朗拿度入镜寒暄一番，不过C朗全程当加历查透明，搞到呢位利物浦名宿面懵懵企喺中间傻笑。
「双红会」赛前热身期间，C朗行去《天空体育》场边嘅直播区，企中间嘅加历查第1时间伸手想同C朗握手，但C朗并冇反应，直接走去同加利仔搭膊头倾偈，倾完後C朗再行去另一边嘅坚尼拥抱，再一次漠视加历查伸出嘅友谊之手，喺佢身边行过都冇望一眼，惨成透明人嘅加历查只能以笑遮丑。
自C朗上季回巢曼联後，加历查就一直批评佢嘅表现，赛前甚至话曼联应该走呢位葡萄牙球星，C朗今次「反击」亦系人之常情。
