周一(22日)凌晨英超大战，作客嘅曼城喺落後2球劣势下，绝地逼和纽卡素3比3，呢场比赛双方对攻战情紧凑，又有金球兼「手术刀」神级助攻，堪称英超开季以来最精彩一战。曼城领队哥迪奥拿赛後直指英超水平提升，劲旅失分将会成为常态。
纽卡素主场面对曼城毫无惧色，虽然开波5分钟就走甩根度简，畀佢禁区内控定射入，但「喜鹊」喺辛特麦斯明带领下疯狂反攻，28分钟米基尔阿米朗追成平手，39分更由哥林威尔逊射入反超前，2球都系由辛特麦斯明助攻；54分钟捷比亚禁区外轰入罚球，令纽卡素领先3比1。
不过曼城球员质素始终高一筹，60分钟艾宁夏兰特门前窝利抽入，4分钟後到奇云迪布尼表演，佢喺中场拎到波後，一记「手术刀」式直线，直接穿过5名纽卡素守将交畀12码点嘅贝拿度施华，後者轻松将个波送入龙门，过程叹为观止！曼城最後阶段狂攻但逃唔过尼克普比5指关，最终双方踢成3比3完场。
利物浦开季2场失分、曼联2战全败、车路士周日(21日)又吞列斯联3蛋，哥迪奥拿赛後表示：「我哋要习惯呢个新环境，呢个系英超困难嘅地方，所有球队都会失分，我哋今场失咗第1个2分。考虑到一度落後2球，我哋都展示出自己嘅实力，球迷会好享受呢场比赛。」英超目前只有阿仙奴喺3轮後保持全胜。
